بقلم الشاعر
...........


محمد عباس
.........


هيَ بدايه ولا نهايه
ولاَ قوسين
فـ الوسط حكايه .

هيَ بدايه
وكانت حلوه
عِرفتها عيونا
بـ نظرايه .

عرفتها الدنيا
بفرحتنا
شوق ولهفه
وضحكايه .

واللون الاسود
بقي ابيض
دبله فـ صباع
وردايه .

عرفها الاحساس
أجمل معني
والمعني جمله
فـ آيه .

قالت طيبه
قصادها الطيبه
و أتلم الشمل
فـ جُمعايه .

ضحك وفرح
مداه الدنيا
لمعة عين
علي ضوء شمعايه .

فينا الكلمه
تحايل كلمه
وكسوف تداريه
الهمسايه .

شِتانا دفانا
وصِفنا هوانا
والليل يخطفنا
بسَهرايه .

ضيوف الليل
صحبه جميله
مشاعر فـ وجود
قمرايه .

يخطفنا النوم
منا ويجي
رمشايه تعِينها
الرمشايه .

يصحي الاول
قبل التاني
يكتبها الكلمه
علي مرايه .

ويجي التاني
يرد عليها
يرسم قلبه
فـ رسمايه .

نجري م نتعب
نفرح نلعب
وعيونا م تعرف
دمعايه .

ونرسم بكره
بمليون فكره
أفكار بيفكرها
معايه .

كانت أجمل
أحلي حكايه
وبعد شويه من
الضحكايه .

...........

ماتت الضحكه
الصافيه الحلوه
ودبلت شمعه
فـ كُبايه .

ومراية الوعد
مليون حته
وأتهد الجبل
بقشايه .

أتهد بكلمه
ضد الكلمه
والكلمه كتبتها
نهايه .

ستاير ذكري
ونزلت فجأه
وراها وكانت
أحلي روايه .

واتخنقت جوا
الذكري دموعنا
بدات من بعديها
نهايه .

نهاية بكره
بداية ذكري
حكايه وختمتها
حكايه .

نهايه وكانت
من غير داعي
ايد علي ايد
واخبطها معايا .

كنا بدايه
بقينا نهايه
ما بينهم كانت
أحلي حكايه .

#بدايه_ونهايه
٢٠١٧/١٢/٢٥