لا
من ديوان/ سيبنى أحلم
للشاعر/ مصطفى فريد

لو هتيجى بألف قلب جديد
هاقولك لأ
لو بدرتى الكون شموع بتقيد
هاقولك لأ
أنا شفت الخداع منك
مافيش غير البعاد عنك
سماكى لو بتمطر حب
أموت عطشان بعيد عنك
وأرضك لو بحور من ود
أشوف لى أرض غير ارضك
ولا اسمح يوم اشوف قلبى
ومهما كان فى يوم حبك
يكون لعبه مابين إيدك
ودميه حزينه يوم عيدك
ما عاد ليكى إختيار عندى
وعاندى قد ماتعاندى
أنا نسيتك
نسيت كدبك
نسيت زيفك
نسيت حتى حروف اسمك
ومهما القلب بات عطشان
راح ارويه من أمان بعدك
ولو كان ع الوفا ندمان
راح انساكى واعيش بعدك
حزين يمكن
لكن رافض أشوف قلبى
فى يوم عبدك
دى نار هجرك احن كتير
من الجنه وانا جنبك