بقلم الشاعر/// رمضان البربري
.........


...مصاحب كل الناس..للشاعر رمضان البربري

ومصاحب كل الناس
عشان قلوبهم ماس
فيها الروح والفطرة
والحب والإحساس

ومصاحب العجلاتي
بصبح علية يوماتي
وعمي صلاح الترزي
وجارة عمي نجاتي

وصاحبي تيفة الحلاق
وجارة عبدة مشتاق
فكهاني الزوق العالي
سادد الحارة والزقاق

وألاغي البية والفقري
وعم فتيحة الغجري
والبنت الحلوة بطة
وأختها فلة السمري

وألاغي الخالة فايقة
بتاعة الخضار العايقة
ضحكتها حلوة تملي
ودعوتها سهلة ورايقة

وأحب خالتي ذنوبة
جارتنا القشطة اللهلوبة
وأختها الحلوة سمارة
أم قصة أعجوبة

والبنت الشاطرة دينا
مزيعة قناة سينا
وأخوها المتعجرف
أحسن من مين فينا

وامشي أقول يا باسط
وفي الأتوبيس ناطط
واشاور لبتاع التكتك
وصاحبي علاء الظابط

وأنزل علي الكورنيش
ألاقي خيشة وعليش
بتوع الدرة والسميط
أشتري وادفع بقشيش

واركب مركب نيلي
واسهر علي شط نيلي
واغزل كام موال
وأقول يا عيني يا ليلي