بقلم الشاعر // رمضان البربري
.......

...تحت التوتة والجميزة...للشاعر رمضان البربري

تحت التوتة والجميزة
كان فية ألف حاجة عزيزة
كنت أستني قبل معادي
كنت أشوف الحلم قصادي
والاقيكي جاية بفستان رمادي
ووردة حمرا وألف ميزة
أمسك كتابك أقلب صفحاتة
ألاقي حروف إسمي وفتحاتة
وألاقي قلبك فارد جنحاتة
واخدني وطاير في العلالي
قلبي يدق وتزيد دقاتة
تحمر خدودك من خفقاتة
أمسك إيديكي تضيع ساعاتي
والمغربية قمرها يلالي
أحضن عينيكي وارحل بعيد
تحت شباكك قلبي عنيد
بتشاوريلي أمشي بعيد
بس قلبي فرحان سعيد
وامشي أروح بخطوة وميلة
وكل مافيها ليالي جميلة
أمسك وسادتي بعيون كحيلة
أنام واصحي وناري تزيد
أقوم أجري علي شباكك
تفتحيلي ترميلي جوابك
أفتح واقرأ وانا ملهوف
تحت التوتة أجري واشوف
بين السطور إحساس وأماني
وغزل أشواق وكتير معاني
أحضن هوايا وأقول من تاني
إمتة هجيلك وأدق بابك