بقلم الشاعر
.............


جمال سعد
............


........ ايام زمان.......

ايام زمان حد فاكرها
كان خيرها كتير ومكفيها
والبدر بتاعها يشق الليل
يحضن في سماه ويدفيها
والموجه الهاديه على الشطين
ومراكب سارحه في مراسيها
بشراعها بتحضن كل الناس
فرحانه لبر بتعديها
تتبختر على صوتها الميه
ونجوم بالليل حتسليها
والابن زمان كان له طله
على امه الضحكه بيرميها
وبيعرف ايه معنى الإخلاص
يطلب من المولى يخليها
لابوه كان عارف ايه قيمته
ولا كلمه يقولها يتنيها
والدنيا جميله وفيها الخير
كان فيها الالفه تحليها
لكن دلوقت ماعدتش أمان
في الدنيا وكله مقضيها
والكل بيقول ياله يانفسي
وامانته تضيع مابيوفيها
لوشوفنا جنيه بنقول اوكيه
والروس في الوحل نوطيها
ونسيب البنت في نص الليل
في الشارع تنزل وحديها
ولا بنقول ليه نازله الشارع
أو مين ياولاد حيوديها
ونقول للناس دا كلام فاضي
بكره الايام حتربيها
معقوله الدنيا خلاص راحت
من أيدنا ومين حيمشيها
...................
كلماتي جمال سعد