بقلم الشاعر // أحمد العزى
........

وحياة عنييك
سمفونية حبٍّ ووفاء للأم
لهجة محكية مصرية
---------

الله عليك
وحياة عنييك
حضنك يا ماما جنتي
وحياة عنييك
ظلك مجرة فرحتي
مليش أمل غير ضحكتك
تطفي أسايَ وحسرتي
يوم بعد يوم
يجري الزمان
وأكبر واعيش
ويظل قلبي ملوش مكان
فيه الأمان
غير بين إيديك
       ***
الله عليك
وحياة عنييك
إنتِ الحياة بنورها وبظلها
وإنت اللي حضنك
يحتويني يوم تغيَّر وشَّها
وتأخذ أمانينا بعيد وتعضَّها
وإنتِ اللي قلبي يحبها
مليش حياة من غير رضاك
وفرحتي
مابحسَّهاش
من غير لمسة نور إيديك
        ***
الله عليك
وحياة عنييك
من غير حنانك دنيتي خوف وألم
وبدون رضاكِ جمالها ملوش نغم
تكفيني نغمة بسمتك
تشفيني نسمتك جنتك
واشوف مناي
باقة عبير
تزرع بقلبي فرحتك
وادبل واموت
لو يوم عنييك
بلَّت حياتي بدمعتك
اقلقْ عليك
وامسح بخوفي ولهفتي دمعة عنييك
وبكل حبي أبوس إيديك
        ***
الله عليك
وحياة عنييك
الجنة مفتحها رضاك
والفرحة تبدا وتنتهي ديماً معاك
والدنيا ما تسوى بغير شمعة هَناك
وقطرتين من نور دُعاك
إنتِ السلام
وإنتِ الهنا
وإنتِ السعادة والمنى
وإنتِ اللي رحمة ربنا ورضاه
معقودُ بإيديك.
------